قبل مانبدأ اي شروحات وزارة الهجرة الاسترالية عندها موقعها الخاص (Border.gov.au ) ... الموقع دا من خلاله ممكن تعرف كل المعلومات عن انواع الفيز وبتقدم خلاله وبتعمل كل شئ عبره .... الموقع دا بيحتوي علي شروح شاملة وتفاصيل لانواع الفيز المختلف المعروضة من قبل ادارة الهجرة ... ( في انواع متعددة زي فيز سياحة/عمل/عائلة/عمالة مؤهلة) بس نحنا حنركز مع ال skilled visas .....
بالنسبة للمهاجرين المؤهلين لأستراليا عادة في تلاتة انواع من الفيز اللي ممكن يقدمو عليها هي بالارقام (189/190/489) .... التلاتة فيز دي كلها بتتفق حاجات اساسية وشروط عامة يجب انها تنطبق علي كل المتقدمين (حنشرح في بوستات لاحقة الفروق بينهم التلاتة بالتفصيل ) ....( اي زول بيستوفي الشروط التحت ممكن يقدم ويلقي اقامة بدون صعوبة )......
في الاول نحن نتكلم عن المتطلبات العامة في كل الفيز دي ...
1/ اول شرط ... انك تكون صاحب مهنة مطلوبة في استراليا .... المهن المطلوبة هي اما في اللستة الاولي SOL ودي بتخليك تقدم لي فيزا 189 ( دي بتخليك تقدم بشكل مستقل ) ودي ممكن تشوف مهنتك فيها في اللنك
او لو حتقدم للفيزا 190 او 489 ( دي بتستزم منك ولاية ترعاك قبل ماتقدم ليها ) تكون مهنتك في اللستة التانية CSOL ... في اللنك
( مااعتقد انك ماتلاقي وظيفتك في واحدة من الاتنين ديل لانو التانية دي بالذات لستة كبيرة جدا وفيها رقم لايستهان به من المهن ) ...
2/ الشرط التاني ... تقدر تجيب Skill assessment (معادلة لشهادتك من الجهة المختصة بمعادلة شهادتك في استراليا) .... دي حتلاقيها في اللستة الفوق جمب اسم مهنتك ورقمها ومكتوب assessing authority ... جهة التقييم ... فيها لنك بيوديك لصفحة الجهة المختصة ... وكل جهة عندها متطلبات مختلفة ورسوم مختلفة لتقييم الشهادات ....
3/ الشرط التالت .... عمرك اقل من 50 سنة (دي مادايرة شرح 
)
)
4/ الشرط الرابع ... تقدر تجيب ايلتس IELTS 6 في كل باند ( ركز مش 6 توتال) او مايعادله من اي اختبار لغة انجليزية معتمد لادارة الهجرة ك ( PTE, TOEFL ) او خلافه ...
5/ الشرط الخامس تقدر تجيب 60 نقطة علي الاقل في اختبار النقاط..... ( هو اختبار بيحسب عمرك ومؤهلاتك وخبراتك وبيديك نقاط علي اساسهم ) .... ودا توزيع النقاط فيه كالتالي تعال واحسب ...
العمر
18-24 سنة = 25 نقطة
25-32 سنة = 30 نقطة
33-39 سنة = 25 نقطة
40-44 سنة = 15 نقطة
44-49 سنة = صفر نقطة
شهاداتك ومؤهلاتك
دبلوم = 10 نقاط
بكالريوس = 15 نقطة
ماجستير = 15 نقطة
دكتوراة = 20 نقطة
( مع ملحوظة مهمة انو بياخدو اعلي مؤهل فقط ... يعني ماجستير وبكالريوس لاتساوي 15+15 بل 15 بتاعت الماجستير بس )
خبرتك العملية
صفر سنة لحدي سنتين = صفر نقطة
3 سنين – 4 سنين = 5 نقاط
5سنين-7 سنين = 10 نقاط
8 سنين فما فوق = 15 نقطة
( ركز انو بيحسبو شغلك الفي اخر 10 سنين بس مع شرط انو يكون في مجالك ... اي شغل برة مجالك غير محسوب كخبرة)
مستوي اللغة الانجليزية
6 في كل باند في الايلتس = صفر نقطة (6 اسبيكنغ- 6 ليسننغ – 6 رايتينغ – 6 ريدينغ)
7 في كل باند في الايلتس = 10 نقاط
8 في كل باند في الايلتس = 20 نقطة
( الشرط انو يكون في كل باند والامتحان ماتم تلاتة سنين لحظة التقديم ... والامتحانات المعتمدة الموازية مقبولة بشرط انو تجيب الدرجة في كل قسم )
عوامل اضافية كالزوج/ة او نوع الفيزا نفسها
لو عندك زوج/ زوجة او رفيق/ة .... بشرطين ... عندو مهنة في نفس اللستة الفوق وممكن يعمل تقييم لشهاداتو + شهادة ايلتس 6 برضك .... دي = 5 نقاط اضافية
نوع الفيزا برضك بتديك نقاط حسب النوع المقدم ليه ...
لو قدمت لي فيزا 189 (skilled independent ) بتديك = صفر نقطة اضافية
لو قدمت لي فيزا 190 ( skilled nominated ) بتديك = 5 نقاط اضافية
لو قدمت لي فيزا 489 ( Skilled regional ) بتديك = 10 نقاط اضافية
)ركز انو فيزا 190 وفيزا 489 بيستلزمو ولاية ترعاك حتي تاخد النقاط دي ... مااي زول بيقدم بيشيل النقاط دي )
بعد كده احسب براك عندك كم نقطة
كده دي كل النقاط وكل النظام والمتطلبات الاساسية ..... لو بتقدر تحقق المطالب دي وبتقدر تجيب 60 نقطة او اكتر في الاختبار الفات بتاع النقاط وتتستوفي المتطلبات الاربعة الفوق ... كده مبروك انت مؤهل وممكن تهاجر .
حنشرح في البوستات اللي الجاية كيفية التقديم بعد ماتستوفي المتطلبات دي ... والفرق بين نظام انك بتهاجر بدون ولاية زي فيزا 189 و فيز بتحتاج لرعاية ولاية من استراليا زي 190 و 489 وكيف تقدم لولاية ترعاك عشان تاخد النقاط الاضافية وشروط الولاية عشان ترعاك ... والفروق بين الفيز دي ..... وبتاخد زمن قدر شنو .... وكيف تقيم شهاداتك من جهة المعادلة بتاعتك ..... والرسوم وخلافه ....
 ... الموقع دا من خلاله ممكن تعرف كل المعلومات عن انو…){kind=link}
تعليقات
إرسال تعليق