الدخول والإقامة:
تستطيع الدخول الى لبنان بعدة طرق:
- عن طريق حجز فندقي وهاد بيعتمد عالمظهر الخارجي للشخص واسم الاوتيل ولازم تاخد معك ٢٠٠٠ $ مشان مصروف قعدتك بلبنان مدتو على حسب حجز الاوتيل في بعضن بيعطو 9 أيام او أسبوعين .
- عن طريق كفيل لبناني (كفالة شخصية) هي ممكن تكلفك من 600$ وانت طالع مدتا سنة كاملة وبتقدر تنزل على سوريا عدة مرات وترجع تدخل نظامي
- عن طريق كفالة مؤسسة بس بدك تنتبه كتير منيح لانو بهاد النوع العملية كلا وهمية من الشركة للاشخاص للارقام كلو وهمي اذا ماكنت بتعرفو للشخص كتييير منيح او عم تشتغل بنفس الشركة ….هي الكفالة ممكن تكلفك من ٦٠٠$ وانت طالع وبرجع بنبه وبذكر انو القصة وهمية وبدك تنتبه (لانو هي المؤسسة بتكفلك على اساس انك عم تشتغل عندها بشي صفة معينة بس فعلياً انت عم تشتغل بمحل تاني وحتى ببعض المؤسسات بعد سنة من الكفالة بتلاقي تغير اسم الشركة وصارت شركة مختلفة تماما )
- عن طريق إقامة طالب وهي لازم تكون مسجل بإحدى الجامعات اللبنانية وتقدم فيها عن طريق اشعار التسجيل وبتكلفك٢٥٠ الف ليرة لبناني ومدتا سنة وفيك كمان تنزل على سوريا عن طريقا وترجع تدخل لمدة لا تتجاوز ال٦ شهور متواصلة او متقطعة
- عن طريق كفالة بنكية وهي بدك حساب بالبنك واثبات انو راتبك اكتر من 2000$ شهرياً ومدتا سنة
- –عن طريق عقد الاجار او سند ملكية وهي لازم تصدق العقد من البلدية والامن العام اللبناني ومدتا على حسب مدة العقد غالبا 6شهور
- عن طريق بطاقة النقابة(طبية–هندسية-…) بيعطوك على اساسها شهر او ٢٥ يوم
- فيك تدخل لمدة 48 ساعة مع شوفير التكسي يلي رايح معو بيحقلو يدخلك معو حتى لو ما بيقربلك بس بشرط بترجع معو وهي ما بدا دفع
نصائح بخصوص الإقامة:
- يدخل السوريين الى لبنان عن طريق الهوية الشخصية او عن طريق جواز السفر ويفضل من السوريين الدخول عن طريق جواز السفر وذلك لضمان حرية السفر من مطار بيروت لان الامن العام اللبناني لا يسمح للسوريين الداخلين الى لبنان عن طريق الهوية الشخصية بالسفر من مطار بيروت
- لازم ما تخالف على أي إقامة ذكرت سابقاً لإنو بس خالفت ولو كم يوم رح تدفع 200$ للأمن العام اللبناني بالإضافة لبعض الإقامات ممكن يحطولك منع دخول لبنان لمدة سنة كاملة او اكتر .
السكن:
بتلاقي كتير بيوت مفروشة وغير مفروشة والاسعار غالية نوعا ما (طبعا حسب المنطقة)
أفضل مناطق السكن التي تناسب السوريين: مارالياس – بشامون – جديدة – صيدا – عرمون – سن الفيل ويفضل الابتعاد عن الضاحية الجنوبية والاوزاعي وخلدة وضبية.
الإيجارات: وسطي اجار استديو 500-750$ اشرفية
جعيتاوي: 600$ –رأس النبع 500$ –الحمرا: 700-1000$ –فرن الشباك :600$
بشامون:300$-400$
الاوزاعي :350-400$
وسطي اجار غرفة نوم وصالة :400-700$
وسطي اجار شقة من غرفتي نوم وصالة :600-1000$
العمل:
طبيعة العمل في البلد: سيئة
السوريين صعب يتوظفو بشكل عام
معدل الرواتب:
400-600$ للعمالة العادية والخريجين
700$ للجامعين وذوي الخبرة المتوسطة
1500$ للجامعين ذوي الخبرة العالية (وبيعطوك عدة مهام)
– وضع الراتب مع الحياة الاجتماعية: ع القد
– اللغة: العربية – الإنكليزية – الفرنسية
المصروف:
– وسطي المصروف للشخص الاعزب من طعام وحاجات يومية من 10-15$
– وسطي المصروف للعائلة من 4 اشخاص من طعام وحاجات من 30-50$
الدراسة:
أشهر الجامعات بلبنان: الجامعة اللبنانية الحكومية – الجامعة الأمريكية في بيروت – الجامعة اللبنانية الأمريكية – الجامعة اللبنانية الدولية – جامعة البلمند – جامعة بيروت العربية – جامعة الجنان – الجامعة اليسوعية – الجامعة الإسلامية
اللغات المطلوبة للدراسة: الإنكليزية – الفرنسية – العربية
العملة المحلية:
1 دولار = 1500 ليرة لبنانية
الطعام:
أفضل مكان لشراء الطعام:
المواد الاستهلاكية:
- كارفور– سيتي سنتر مول – الحازمية
- سوبر ماركت سبينس (تحت ساسين) – لو شركوتيه عون الاشرفية
- أسواق المتنقلة كل يوم بمنطقة متل سوق الاحد بيفتح يوم السبت موجود ب جب جنين
- سوق صبرا هاد ببيروت جنب السفارة الكويتية منيح كتير بالنسبة للخضروات وبتلاقي فيه محلات متل اللي كإنو يتسمو بالشام ويفضل تشتري من عندو السكر والرز والمعكرونة واللحمة والدجاج (لإنو دبح حلال)
- اللحم والدجاج: يوجد لحامين وبياعين جاج متل بالشام بس انتبه انو يكون الدبح حلال ويفضل تشتري من صبرا وبالسوبر ماركات الكبيرة في كتير ولا تنسوا السمك او اللحم النظيف غالي
الدجاج في محل بخلدة أسمو حرقوص بتلاقي الجاج عندو رخيص نوعا ما
- وسطي سعر الوجبة للشخص الواحد 5$
- أفضل المراكز التجارية: كارفور: كبير ورخيص – لو شركوتيه عون: صغير ورخيص – كواوب: صغير ورخيص ومنتشر كتير – سبينس: متوسط الحجم والسعر
- ودائما باخر كل شهر بهدول المراكز في عروضات على غراض معينة كمان فيك تستفيد منن وبأعياد الفصح والشعنينة بتصير العروضات عالبيض واللحمة
الاتصالات والمواصلات:
اهم وسيلة اتصال في البلد بين بعضهم البعض: الخطوط الخليوية والارضي
شركات الخطوط الخليوية: شركة الفا وشركة ام تي سي لما بدك تشتري الخط بتكلف 10 الاف لبناني
ولازم تعبي الخط شهري للأيام والرصيد
الأيام للشهر ب 15 ألف لبناني والرصيد 10$ ب 15 ألف لبناني أي ما يعادل 10$
تكلفة الاتصال حوالي 35 سنت من الدولار الأميركي بالدقيقة الوحدة
لما تروح تتصل من محل موبايلات إذا كانت المكالمة دولية او محلية بياخدو تقريبا 1000 ليرة لبناني على 3 دقايق
- الاتصالات: غالية
- أفضل طريقة للواحد يتنقل بهالبلد: وسيلة نقل عامة (باص) او تكسي سرفيس والتنين نفس التكلفة 2000ليرة لبناني
الصحة:
المشافي الخاصة غالية في المشافي بالمناطق البعيدة متل طرابلس أرخص من بيروت
نصائح عامة:
- دير بالك من شوفير التكسي فاصل قبل ما تطلع
- حاول تتجنب الحديث بالسياسة وخصوصا إذا كنت بالضاحية الجنوبية
- دير بالك من الطائفية بلبنان احتمال تلاقي تعامل سيء جدا او تلطيش حكي وانت ماشي بالشارع من بعض اللبنانيين لمجرد أنك سوري او من طائفة معينة طنش ولا تعلق مع حدا لإنو بيصير الحق عليك
- التزم عدم كثرة الكلام وخصوصا في الأماكن العامة
- التعامل بين الناس في لبنان بيفرق كتير عن التعامل بين الناس في سوريا
- لا تحسب كلشي عالليرة السورية لإنو بدو يوجعك راسك
- لا تفوت بسيارتك السورية على أماكن فيها ناس او تجمع او أحزاب معينة
- لاتاكل اكل جاهز لإنو ما عاد يكفيك شي ابدا اعتمد عالطبخ المنزلي
- انتبه من النصب وخليك حذر كتير بالتعامل معن (شغلك–دراستك–تعاملك العادي) مو تعميم في ناس لبنانية مناح وفي عاطلين متل اي بلد.
- لا تطلع بتكاسي خاصة إذا ما كانت نمرة السيارة لونا احمر ومكتوب عمومي لإنو ممكن تكون مخصصة لأساليب نصب تانية.
- لما بتطلع بتكسي عمومي قلو طالع سرفيس بياخد 2000 ليرة لبناني عالشخص الواحد لا تخلي حدا يضحك عليك
منظمات اغاثية بتساعد اللاجئين السوريين متل:
- الامم المتحدة الاتصال على الخط الساخن :009611820848 من الاثنين الى الجمعة من ٧ صباحاً حتى ٥ ظهراً
- أطباء بلا حدود :0096176138197
- اليونيسف: 009611756101
- الهلال الأحمر القطري 0096181652504
- مركز كاريتاس لبنان للمهاجرين:
بيروت برج حمود: 0096176412088
مريجة: 0096170157789_009611466470
الدكوانة: 0096170168203_00961681942
ضبية: 0096170191182
سن الفيل: 009613310471
رميلة :0096170251290
كسروان _ريفون: 009619958471 - الرعاية الطبية الطارئة في البقاع: 0096170198689_0096176870354
- المجلس النرويجي للاجئين(NRC) : 0096176777236 _0096176666950
- اللجنة الدولية للانقاذ (IRC): 0096176801849
- اللجنة الدولية للصليب الأحمر للبحث عن المفقودين ولم شمل الاسرة: 009614410648_00961190560_0096190570
- إذا كنت بحاجة لدخول المشفى والحالات الطارئة الاتصال على الخط الساخن:009611504020 ( NEXtCARE)
تعليقات
إرسال تعليق