بالتفصيل خطوات الحصول على تأشيرة امريكا السياحية 2020

كتب Mostafa Hamed

اول خطوة هتتصور صور مقاسها 5 * 5 بخلفية بيضاء
(وخلى بالك تعرف بتاع الاستوديو انه ميلعبش فيها نهائي ) لا يعدل حاجة ولا ينضف ولا يغير الوان او اضاءة ولا اي حاجة نهائي .. 

**بعد كدة هتملا ابليكيشن اسمه ds 160 من الموقع https://ceac.state.gov/genniv/

وطبعا الأبليكيشن ده طويل جدا واسئلته كتير عن بياناتك وبيانات عيلتك .. فممكن لو كتبت جزء تعمله حفظ وترجع فى اي وقت تانى وتكمله .. و بلاش تكتب اى معلومة غلط
وبعد ما تخلص الابليكيشن هيظهرلك ورقة ببياناتك وصورتك وباركود اطبعها عشان دى (هتحتاجها فى السفارة) ..

**هتعمل اكونت على الموقع ده http://www.ustraveldocs.com/
هيطلعلك ورقة اسمها "قسيمة إيداع رسوم طلب التأشيرة" عليها رقم ليك الى هو رقم اسمه CGI اطبعها وروح بنك cib عشان تدفع تمن التاشيرة بتكون 160 $ تقريبا بتكون فى متوسط 3200 جنيه ممكن أقل (هيكون مكتوب عليها تمن طلب التأشيرة) وهيديك فى البنك ايصال بالدفع حافظ عليه عشان (هتحتاجه فى السفارة)..

وخلى بالك ورقة CGI هيكون مكتوب فيها تاريخ إنتهاء الصلاحية يعني لازم تروح وتدفع قبل التاريخ ده ومتقلقش الصلاحية وقتها طويل تقريبا سنة كاملة

وبعد 24 ساعة (عمل) من وقت الدفع بتفتح الموقع وتدخل الكود بتاعك لحد ما تلاقي ان تم تفعيل الدفع بيظهرلك مواعيد فى السفارة بتحدد الموعد الى يناسبك من المواعيد المتاحة واطبعه عشان (هتحتاجه فى السفارة)..

وبالنسبة لكشف الحساب مفيش مشكلة لو شهادات مش حساب جاري ولو اكتر من كشف .. ولو انت طالب هات برده كشف حساب والدك او والدتك أو حد من أخواتك..
طبعا مقدرش أقولك الرصيد بحد أدنى كام ولكن المهم يكون الرصيد معقول وليكن مثلا مش اقل من 70 ألف جنيه (والكشف يكون لحركة آخر 6 شهور) وحركات السحب والإيداع الكتيرة هي دي المهم

يعني لو انت بتفكر تقدم مثلا لأمريكا بعد كذا شهر ابتدي فى حسابك كل يوم اسحب مبالغ وأودع مبالغ .. اعمل حركة فى حسابك
بالنسبة انك سافرت قبل كدة طبعا بتقوي موقفك إلى حد ما وطبعا حسب السفرية لو كانت شنجن هتكون كويسة ولو انجلترا مثلا هتكون كويسة اكتر واكتر..

ولكن مفيش مخلوق يقدر يقولك انك هتاخد رفض او هتاخد الموافقة ((دى متوقفة على مزاج القنصل الى هتعمل معاه المقابلة وهقولك تعمل ايه فى المقابلة)) فلو تقدر تسافر الاول سفرتين مثلا ومنهم واحدة شنجن موقفك هيبقى اقوى ..

طبعا هتسافر سياحة قوله انك رايح اورلاندو مثلا أو نيويورك.. وقبل ماتروح السفارة من على النت جمع معلومات عن اورلاندو كانك هتروحها فعلا وارسم لنفسك خطة سفر وسياحة وزيارة للمعالم واعرف كل التفاصيل الى هناك عشان القنصل هيسألك ..

ولو انت طالب صغير فى السن وهتسافر كندوة دراسية أو كورس فيفضل ان والدك أو والدتك يقدموا معاك كمرافق (على أساس يعني انك صغير فى السن وطالب هتكون معاك والدتك عشان تاخد بالها منك) برده إلى حد ما هتقوي موقفك

بالنسبة بقى للورق الى تحضره معاك للسفارة الامريكية :
1- ايصال دفع فلوس التأشيرة الى قولت عليه (مش مهم اوى ولكن احتياطي)
2- ورقة الابليكيشن الى فيها بياناتك وصورتك وباركود (مهمة جدا ومش هتدخل السفارة من غيرها)
3- صورتين شخصيتين الى قولتلك عليهم فى الاول (مش هتدخل من غيرهم)
4- الورقة الى انت طبعتها وعليها معاد المقابلة (ممكن أمن البوابة يسالك عليها وممكن لا)
بالنسبة للورق لمقابلة القنصل:
5- حجز فندق مبدئي فى المكان الى المفروض هتروحو سياحة والمدة من 12 ل 15 يوم لا اكثر ولا اقل (بإعتبار ان امريكا بعيدة ودي امريكا فمينفعش انك تقوله انك هتسافر 5 ايام مثلا وفى نفس الوقت مش اكتر من اسبوعين بإعتبار اي واحد سواء كان بيشتغل أو طالب مرتبط بحاجة هنا).
6- حجز طيران مبدئي بداية من اول يوم حجز فندق لاخر يوم حجز الفندق (يعني الاتنين يكونوا زى بعض فى التواريخ)
7- كشف الحساب بتاعك وبتاع والدك أو والدتك أو اي حد من عيلتك.
8- لو انت طالب هات شهادة قيد من جامعتك.

ولو انت شغال هات جواب عمل
ولو انت صاحب عمل هات السجل التجاري والبطاقة الضريبية

(وطبعا كشف الحساب يكون بالانجليزي وأي ورقة عربي لازم تترجمها ترجمة معتمدة من أي مركز ترجمة معتمد).
وعموما بنسبة 90% مفيش حد بيبص فى الورق الى معاك ولكن احيانا حد بيطلب يشوف ورقة معينة (فلازم الورق كله يكون معاك احتياطي)..

وأول ما تدخل من بوابة السفارة هتدخل على غرفة التفتيش (وعشان تريح نفسك بلاش تاخد معاك مفاتيح او فلاشات او ولاعات او اي حاجة معدنية) خلى كل اللى معاك محفظتك وورقك وباسبورك وبس .. تليفونك الحاجة الوحيدة اللى بتسلمها في الأمانات أما اي حاجة تانية ممنوع تدخل بيها مش هياخدوها منك فى الأمانات هيقولولك اخرج برة ارميها او وديها اي مكان اتصرف ...

بعد غرفة الأمن (التفتيش) هتدخل تاخد رقم حجز للشباك الى هتروحوا (ومش ده شباك القنصل) لما ييجي دورك هتلاقي موظف أو موظفة (احتمال كبيرة مصرية) و هتستلم باسبورك و الابلكيشن اللى هو ds 160 (ولو انت هتسافر دراسة هتاخد منك كمان ابليكيشن اسمه i20)
وهـتبصم فى جهاز على الشباك (وعموما الإجراءات متقلقش منها هما هيقولولك على كل حاجة انت تعملها) وهيستلموا منك الحاجة دي ويقولولك استريح شوية

وبعد كدة هييجي دورك تانى فى الشباك الى جنبه عشان تستلم باسبورك والورق الى هما خدوه منك
وبعد كدة هقتعد بقى تستريح شويتين حلوين عشان تستنى دورك فى المقابلة (الشويتين دول ممكن يبقوا ساعة أو ساعتين أو اكتر حسب الزحمة ودايما بتبقى زحمة على فكرة)

متقلقش في هناك مشروبات وحمام (عيش حياتك واتصرف بطبيعتك)
وبعد كدة الدور هييجي عليك رقمك هتروح لشباك كذا .. هتروح للشباك هتلاقي القنصل الأمريكي سواء راجل أو ست أو كبير أو صغير (هما كتير وحسب الى ييجي حظك معاه)

مقابلة السفارة الامريكية وأهم الاسئلة وكيفية الرد عليها 

**بالنسبة لاسئلة القنصل :
هتسافر فين وليه ؟ - هتعمل ايه هناك ؟ - اشمعنى المكان الى انت حددته ؟ - متجوز ولا ؟ - بتشتغل ايه او لو بتدرس يبقى بتدرس ايه ؟ - عندك حد فى امريكا ولا لا ؟ - ساكن فين ؟ - سافرت فين قبل كدة فى اخر 5 سنين ؟

تقريبا بنسبة 90% الاسئلة مش بتخرج عن الى قولتهولك
(أوعى تكذب أو تقول معلومة غلط هما بيكونوا عارفين كل كبيرة وصغيرة عنك ومتصدقش حد بيقولك لو ليك حد هناك متقولش عليه عشان ميقولش انك هتروح تعد عنده ومترجعش)

المقابلة بتاخد 3 دقايق او اكتر شويه يعني مش بياخد ويدي معاك فى الكلام كتير وساعتها وانت واقف هيقولك مبروك أو لا قدر الله هيقولك آسف أنا مش موافق ..

لو وافق عليك هيديك ورقة كدة (الى هيا ورقة القبول) ومش هيرجعلك الباسبور.

لكن لو لاقدر الله مش هيوافق هيرجعلك الباسبور وورقك وهيديك ورقة الرفض (لونها أزرق تقريبا) - الورقة دي مكتوب فيها سبب الرفض وبنسبة 99% هيكون سبب الرفض انه مش واثق انك هترجع مصر لما تسافر (وطبعا مفيش ختم رفض على الباسبور)

**نيجي بقى للمهم .. انت بقى المفروض تعمل ايه فى السفارة ..

اسئلة القنصل الغرض منها مش انه يعرف اجابتها هو بالفعل عارف انت مين و هتعمل ايه وعارف كل الإجابات ولكن هو عايز يقرا افكارك ويشوف طريقة كلامك واجاباتك.
كلامك يكون باختصار ومتخرجش عن الموضوع وبابتسامة وصوتك ميكونش واطي وميكونش عالى .. وانت بتتكلم عينك فى عينه ..
هما قعدوا سنين طويلة يدرسوا الحالة النفسية ولغة الجسد .. اوعى تكدب وكلامك يكون معقول وبلاش تردد او لخبطة .. وبلاش تحسسوا انك هتموت على امريكا لازم تحسسوا ان الموضوع عادى .. وفى نفس الوقت انت مهتم انك تسافر امريكا (يعني كلامك يكون وسطي)

بالنسبة فى وقت انتظارك المقابلة داخل السفارة ..

بلاش تبص يمين وشمال كتير وبلاش توتر.. قعدتك تكون على طبيعتك وتكون هادى .. بلاش تتفقد المكان كتير .. طبعا هتبص هنا وهناك طبيعي ولكن بلاش كتير .. اعتبر انك قاعد في بيتك لوحدك بتتفرج على التليفزيون .. لان طول قعدتك الوقت ده كله ممكن يوصل لساعتين او تلاتة كل الناس بتكون متراقبة بالكاميرات .. وبلاش تقرا الورق الى معاك او تبص فيه ..

اول ماتدخل ع القنصل بتديله الباسبور والابلكيشن وبرده فى الآخر هيخليك تبصم تانى على جهاز على الشباك بابتسامة تقوله صباح الخير او السلام عليكم .. عادى جدا على طبيعتك خاااالص .. وسيب الباقى على ربنا ..

ونصيحة .. المقابلة دي تعتبر زي اي انترفيو فى اي شركة كبيرة (لو تعرف تروح تعمل انتر فيو فى اي شركة بس تكون كبيرة جدا هتبقى مفيدة ليك هتفهم الأسئلة بتتسأل ازاى هتاخد ثقة الانترفيو .. الخوف الى جواك هيقل إلى حد ما .. يعني مش شرط تشتغل المهم تروح انترفيو) وطبعا بغض النظر عن الفارق فى الانترفيو.

متصدقش حد يقولك انت سافرت كتير يبقى انت هيتوافق عليك أو العكس (كل ده متوقف على القنصل نفسه الى هتعمل معاه المقابلة ارتاحلك ولا لا) ولكن كل اللى بنقوله ده عشان يقووي موقفك.

فى تاشيرات 3 شهور وفى تأشيرات 6 شهور وفى تأشيرات 9 شهور .. بعد ما تاخد التاشيرة اتصل بالسفارة او ابعتلهم ايميل واسالهم واكتبلهم رقم التاشيرة بتاعتك

(والكلام ده ينطبق أكيد فى وجودك داخل أمريكا أما خارج أمريكا فيها أقاويل ممكن اه وممكن لا عشان كدة بقول كل واحد يسأل عن تأشيرته وهما عادي بيردوا على أي استفسار بخصوص التأشيرة)
وخلى بالك بعض الناس بتقدم انها تروح معرض تبع شغلها ممكن التأشيرة تكون مدتها صغيرة 6 شهور أو 3 شهور يعني مش التأشيرات كلها 5 سنين (ولكن معظمها)

اتمنى الكلام اللى فى المقال ده يكون فيه إفادة - وبالتوفيق للكل
الكلام ده عن خبرة كبيرة جدا وعن تجربة وتعامل مع السفارة الأمريكية فى القاهرة أو القنصلية فى اسكندرية كتير جدا يمكن اكتر من 20 مرة

*ملحوظة هامة جدا:
لو التأشيرة انتهت من سنتين مش اكتر وعايزين تعملوا تأشيرة جديدة أو فيما يسمى تجديد التأشيرة بنسبة كبيرة جدا هيتم عمل نفس الإجراءات ولكن بدون الذهاب للإنترفيو .. بعد عمل الابليكيشن وباقي الخطوات على الانترنت يتم إرسال الباسبور إلى السفارة .. ده فى حالة فقط التأشيرة ال 5 سنين ومطلوب التقديم لنفس نوع التأشيرة (واحيانا بنسبة ضئيلة بيتصلوا ببعض الناس عشان ييجوا يعملوا انترفيو بنفسهم)
ده كلام القنصل نفسه ...