القائمة الرئيسية

الصفحات

إجراءات التقديم على تأشيرة أمريكا (B1-B2) للسياحة

 
إجراءات التقديم على تأشيرة أمريكا (B1-B2) للسياحة 
 
١/ نموذج طلب التأشيرة DS-160 
 
لازم تكون مجهز صورة شخصيه ٥×٥ بالمواصفات المطلوبة عشان تعمل لها ابلود فى آخر خطوة فى الأبليكيشن
لما تتصور إطلب الصورة سوفت كوبى من ستوديو التصوير
بعدين بتوقعها الكترونيا و تطبع الكونفيرميشن
اطبع صفحة الكونفيرميشن فقط
رقم الأبليكشين هتحتاجه فى الخطوة الجاية
الأبليكشين بيكون متاح لفترة 30 يوم بعد كده بيتلغى و بتعمل واحد جديد .
 
٢/بعد كده بتروح تعمل ملف شخصي على الموقع التالى 
 
فى الملف بتملي شوية بيانات شحصية و تدخل رقم الأبليكيشن اللى فات
بعد كده بيطلع لك أوبشن إستلام الباسبور بتختار مكان الإستلام
بعد كده بياخدك على صفحة الدفع بيفتح لك إستمارة فيها بياناتك بتطبعها و تروح بيها البنك تدفع ( بنك cib )
 
الإستمارة بتكون سارية لمدة خمس أيام من تاريخ التسجيل لازم تدفع رسوم الفيزا خلالهم و بعدها بتتلغى و لازم تعمل غيرها 
 
دفع الرسوم و قيمتها ما يعادل 160 دولار (بيكون مكتوب القيمة بالمصرى حسب سعر الصرف) في أى فرع من فروع بنك CIB
البنك بيديك ايصال الإيداع و بتحتفظ بالنسخة الاصلية و بتقدمها مع ورق المقابلة.
 
تفعيل الدفع بياخد وقت و بعدها بيفتح مواعيد المقابلة تقريبا تانى يوم من الدفع و بيتبعت لك إيميل إن تم تفعيل عملية الدفع و تقدر تحدد موعد 
 
٣/ تحديد موعد المقابلة
 
لازم تحدد موعد قبل الإنترفيو لأن مفيش حد بيدخل للسفارة بدون ميعاد مسبق.
تحديد الموعد بيكون من خلال نفس الموقع و على نفس البروفايل اللى عملته فى الخطوة اللى فاتت
 
٤/ هتروح السفاره 
 
المستندات المطلوبة
- جواز سفر ساري
- صورة شخصية حديثه 5×5 سم مطابقة للمواصفات البيومترية المطلوبة
- إيصال دفع رسوم التأشيرة مع العلم أنه غير قابل للاسترداد او للتحويل.
- صفحة تأكيد ملئ الاستمارة (DS-160 ) لكل متقدم
- جميع جوازات السفر السابقة
- كشف حساب بنكى - خطاب HR - أو سجل تجارى و بطاقة ضريبية - أى عقود ممتلكات
القرار هتعرف وانت واقف قدام القنصل
- إما بالقبول و يتم إرسال جواز السفر عن طريق شركة أراميكس إلى العنوان الذى تم تحديده ،وتاخد ورقة خضرا
- أو بالرفض وتاخد ورقة زرقا
- أو بالخضوع لإجراءات إدارية بمعنى حاجة السفارة إلى مزيد من الوقت لإتخاذ قرار بخصوص طلب التأشيرة الخاص بك وتاخد ورقة صفراء
انا نفسي اخدت إجراءات إدارية وبعتلي إيميل بعد ١٩ يوم ، وروحت سلمت الباسبور ف ارامكس ، وبعد كام يوم روحت استلمت من ارامكس الباسبور وفيه الفيزا 

هل اعجبك الموضوع :

تعليقات