القائمة الرئيسية

الصفحات

خطوة بخطوة الهجرة الى استراليا .. والمهن المطلوبة حسب اخر تحديث .. هل أنت مؤهل أم لا

 
عايز تهاجر استراليا باي طريقه ؟؟ يبقي تابع البوست دة واعمله save واقراه كويس
موضوع الهجره لاستراليا متشعب جدا جدا جدا
ولا بوست .. ولا الف بوست هيكفيه

بس هحاول احط ايدي ف البوست دة ع اهم النقط وازاي تبدأ
------------------------------------------------------------
هجره استراليا بنظام النقط .. زي الجمعيه كدة بتفضل تحوش القرش علي القرش عشان في اخر الشهر تجمع مبلغ وتقبض الجمعيه
.

اهو هجره استراليا كدة بالظبط بس بدل فلوس الجمعيه بتكون نقط .. بتفضل تحوش النقطه علي النقطه لغايه لما يبقي معاك اكبر عدد من النقط اللي يسمحلك انك تهاجر
------------------------------------------------------------

اقرأ ايضا

كيفية حساب نقاط الهجرة الى استراليا

المتطلبات والشروط الاساسية للهجرة لأستراليا

عشان تهاجر استراليا لازم تعمل 4 حاجات :
1- يكون وظيفتك ومهنتك اللي بتشتغلها في مصر مطلوبه اصلا هناك في استراليا
2- تجمع الحد الادني من النقط عشان تفتح ملف علي موقع الهجره
3- تمتحن ايلتس عشان تثبت ان لغتك الانجلش قويه
4- تعادل شهادتك بتاعه مصر عشان تعرف تشتغل بيها في استراليا

يعني هما 4 خطوات ( وظيفه مطلوبه + لغه + معادله + تجميع نقط )
----------------------------------------------------------------------

طيب ايه المطلوب واحسب النقط بتاعتي ازاي وايه اقل حد من النقط عشان اهاجر ؟؟
1- لازم تكون مهنتك من المهن المطلوبة في استراليا
طب وانا بعرف مهنتي مطلوبه منين يعني ؟؟
بتدخل الموقع الي جاي دة وانت تعرف
https://www.border.gov.au/…/skilled-o…/combined-stsol-mltssl
دي احدث قوائم المهن المطلوبه بتاريخ 1 نوفمبر 2018
.

وقوائم الوظائف اتعدلوا ل قائمتين : 

the Medium and Long-term Strategic Skills List .. MLTSSL
the Short-term Skilled Occupation List ... STSOL

حد هيسألني ويقولي انا مهنتي فلان الفلاني اهاجر ولا لأ .. صدقني انا مش وزير الهجره ومش حافظ كل المهن وارقامهم .. الموقع قدامك ادخل وشوف بنفسك
-------------------------------------------------------------------
طيب مهنتي مطلوبه وكله زي الفل .. اعمل ايه بقي ؟
تبدا تعرف تقسيمه النقط عشان تحسب انت هتجيب كام نقطه
عشان تعرف تحسب النقط بتاعتك ادخل علي الموقع دة https://www.migration.tas.gov.au/points_calculator
.

لكن انا هكتبهملك بالعربي عشان عارف ان عليا الطلاق ما حد هيبص في لينكات ولا هيتعب نفسه يدخل يشوف المصدر الرسمي .. بس ما علينا
.

1- نقط السن
لو سنك اقل من 24 تاخد 25 نقطة
لو سنك من 25-32 تاخد 30 نقطة
لو سنك من 33-39 تاخد 25 نقطة
لو سنك من 40-44 تاخد 15 نقطة
لو سنك اكبر من 44 تاخد صفر نقطة بشرط متعديش 50 سنه
.

2- نقط الشهادة
بكالريوس او اي شهادة اعلي منها واقل من الدكتوراه تاخد 15 نقطه
يعني لو بكالريوس او ماجستير تاخد 15 نقطه
لكن لو معاك دكتوراه تاخد 20 نقطه
لو معاك دبلوم تاخد 10 نقط .

وهما بياخدوا اعلي شهادة ليك يعني لو معاك ماحستير ودكتوراه هياخدوا نقط الدكتوراه بس
ولازم تعادلها لانها غير معترفه بيها في استراليا والمعادلة بتكون اما تقييم او امتحان ودي بتفرق على حسب الوظيفة بتاعتك
.

المعادله اسمها skill assessment ودي معادله تقييم للمهارات ومش اكاديمك بس زي بتاعه كندا يعني مش بس هتقيم للمؤهل لا كمان ل سنوات الخبره او امتحانات بتعملها الخ
.

طيب اعادلها منين وايه التفصاصيل بتاعه المعادله ؟؟
في 10 جهات تعادل وتقييم فيهم مهنتك بتقدر تعرفهم من الموقع دة
https://www.border.gov.au/…/Skills-assessment-and-assessing…
.

طب افرض انا بشتغل في حاجه تانيه غير اللي درستها !!
يعني انا خريج طب اسنان لكن بشتغل عجلاتي اعمل ايه ساعتها ؟؟ واقيم الشهادة ازاي ؟؟
.

عادي، تقييم المؤهل لازم كده كده يتعمل عشان مش هتعرف تعمل بروفيل من غيره. الوظيفه بقي انت بتقدم علي النوك اللي ليك خبره فيه بغض النظر عن المؤهل
يعني المؤهل بيتقيم وتاخد عليه نقط حسب هما حسبوه كام سنه، بالنسبه للوظيفه بتقدم علي نوك وظيفتك وتجيب شهادة خبره تاخد عليها نقط حسب كام سنه
.

ولكن ولكن ولكن ولكن عشان محدش ينصب عليك ويعملك البحر طحينه
استراليا بالذات لو التقييم للشهادة بعيد عن مؤهلك الاصلي اللي انت اتخرجت بيه بيقلل من نقطك جامد عكس كندا

.
3- نقط سنين الخبره
لو خبرتك 3 سنين تاخد 5 نقط
لو 5 ل 7 سنين تاخد 10 نقط
لو 8 سنين و اكثر تاخد 15 نقطة


.

4- نقط اللغه
الامتحانات المعترف بيها في استراليا يأما ايلتس او بي تي اي
استراليا اقل اسكور بتقبله للايلتس 6666 في كل فرع مش توتال .. لو جبتهم مبتخدش ولا نقطه
لو جبت 7777 في كل فرع بتاخد 10 نقاط
لو جبت 8888 في كل فرع بتاخد 20 نقطة

.
5- نقط المرافق او الشريك
المتقدم الاساسي بياخد 5 نقط من الشريك لو الشريك وظيفته موجودة مع المتقدم الاساسي فى نفس القائمة ويقيم شهاداته زيه بالظبط
ويكون الحد الادني من الايلتس هو 6666 ويسافر معاك
.

عشان تهاجر استراليا للعماله المهره عندك 3 انواع فيزا هما 190 و189 و489
اختيارك لنوع الفيزا بيديك نقاط
فيزا 189 مش هتاخد منها ولانقطة
فيزا 190 محتاجة ترشيح ولاية فعشان كدة بتديك 5 نقط
فيزا 489 بتديك 10 نقط
.

لو حسبت كل النقط دي ولقيت نفسك مجمع 60 نقطة تقدر تفتح بروفايل علي موقع الهجره وتهاجر
دة الارضي بتاع اي مهنه باستثناء المحاسبه الارضي بتاعها 65 وساعات 70 حسب العرض والطلب
-----------------------------------------------------------------

طب هي التكلفه شاكب راكب كام ؟؟
لو فرد لوحدة بطوله من 100 ل 120 الف جنيه
لو فرد و زوجته و طفلين حوالي 250 الف جنيه
ودول بدون اي وسيط او مكتب سمسره انت بتدفعهم اصلا لاداره الهجره والخارجيه الاستراليه

----------------------------------------------------------------
طب انا دفعت كل دة وامتحنت انجلش ونيله و عادلت شهادة و زفت .. و خلاص خدت الفيزا وسافرت
هروح هناك هلاقي شغل ؟؟

بص انت في استراليا عكس كندا .. في استراليا انت بتكون عامل معادله يعني تقدر تروح تشتغل فورا في مهنتك ولكن ولكن ولكن ولكن في عقبه كبيره هتقابلك الي اسمها local experience
ان صاحب العمل الاسترالي هيفضل انه يجيب حد عنده خبره في البلد احسن من اللي لسه جاي جديد وبطيخ في نظام البلد ونظام الشغل
.

وساعتها انت عشان تفهم البلد ف الاول بتشتغل حاجه اسمها survival jobs اللي هي اوبر - كاشير - كول سنتر - مطعم وهكذا عشان تكفي مصاريفك وتظبط وضعك في اول 6 شهور
.

طيب برضو معرفتش بعد ال 6 شهور هعمل ايه ؟
هتبدا تعرض نفسك علي الشركات ف التخصص بتاعك باقل اقل اقل الاسعار عشان تاخدهم كوبري فقط انه يبقي معاك local experience في مجالك وبعدين بعد ما تبقي خبره تبدا تفرض شروطك عليهم
---------------------------------------------------------------
طيب يا سيدي انا عملت كل دة ونقطي كامله و وظيفتي مطلوبه وكله ميت فل واربعتاشر اعمل ايه بقي ؟؟
.

هيكون خلصت المرحله الاولي وتدخل علي ليفل الوحش بقي
المرحله ال بعد كدة شرحها يطول وعايز بوست كامل بس هحاول اكتبلك اهم الخطوات
هتعمل 4 خطوات كمان :
.

1- خطوة expression of interest اللي هي EOI
وده انت بتعمله اون لاين على موقع الهجره في الفيزا اللي انت اختارتها عشان الحكومه الاستراليه تبعتلك دعوة
والمدة اللي هتنتظرها عشان تاخد الدعوة بتكون حسب انت مكمل نقطك ولا مش مكملها وحسب نقطك قد ايه
ودي عايزة شرح طويل اوي هنبقي نشرحها في بوست لوحده
.

2- بترفع كل الورق بعد ما تكون ظبطه بكل الصيغ اللي هما محددينها و وثقته فى EOI
.

3- خطوة مراجعه اوراقك كامله من ال Case officer المسؤل عنك عشان لو في حاجه ناقصه تعملها
.

4- تعمل الكشف الطبى والفيش وتاخد الجرانت بعديها
الكشف بتعمله في مستشفيات هما محددينها
والفيش لازم تعمله من اى دوله قعدت فيها اكتر من 6 شهور وبيكون صالح لمده سنه
وبعد كدة يبقي معاك الجرانت والفيزا والاقامه الدائمه لمدة 5 سنين في استراليا

.
اسئله سريعه
1- في هجره لاستراليا من غير لغه ؟ مفيش
2- مينفعش اعمل معادله لما اروح هناك واسافر ؟ مينفعش لازم تعملها من مصر
3- ينفع اهاجر وانا صفر خبره ولسه متخرج ؟ ينفع بس تفشخ نفسك في الايلتس
4- ينفع اخد اقامه استراليا واروح بيها نيوزيلاندا ؟ ينفع طبعا وتشتغل بيها كمان
5- لازم اروح استراليا فورا بعد ما خدت الفيزا ؟؟ لازم تروح في خلال سنه من حصولك عليها
6- المدة اللي اخدها عشان اهاجر قد ايه ؟؟ لو كل حاجه جاهزة تاخد 6 شهور .. لو مش جاهزة تاخد سنه ونص او سنتين
هل اعجبك الموضوع :

تعليقات

تعليقان (2)
إرسال تعليق
  1. مشكور يا بطل بانتظار البوست ااثاني
    بس سؤال 🙋 شنو تعني ب (ترشيح ولاية) في فيزا 190؟؟

    ردحذف

إرسال تعليق